視網膜穿孔賴阿媽 莊思敏：醫生話應該受到大力撞擊或意外

莊思敏（Jacquelin）、陸詩韻、李蕙敏同胡渭康今日(2017-03-28)喺旺角出席清晰微笑激光矯視中心開幕禮，Jacquelin透露兩年前發現視網膜穿窿，並已即時做手術，佢話：「醫生話我應該受到大力撞擊或意外，我唯一記得係畀呀媽摑，賴我阿媽。」Jacquelin笑言自己戴眼鏡會「趕客」，未能吸引異性，佢話：「以前去蒲，戴親眼鏡都冇人埋身。」佢仲直認目前還未有男友：「o依家好積極出去㗎，之前去party留到凌晨3點，好主動㗎，但係得個韓國仔過嚟，但佢唔識英文，傾唔到偈。身邊嘅朋友都知我好急，安排飯局畀我，o依家要識多啲朋友先。」

另外，李蕙敏就話之前陪媽咪驗眼，自己都驗埋時發現左眼患有弱視，佢話：「因為成日要喺台上表演，遇到強光，台上又好多機關，所以都怕有危險，嚟緊會做手術。」而胡渭康亦有老花，他笑言連餐牌都唔敢睇，回港後唔敢駕車，免生意外，佢亦表示將會進行矯視手術。